അമിത വേഗതയിലെത്തിയ കാര് നിയന്ത്രണം വിട്ട് ആള്ക്കൂട്ടത്തിനിടയിലേക്ക് പാഞ്ഞ് കയറി; 5 പേർക്ക് ഗുരുതര പരിക്ക്
കോഴിക്കോട്: അമിത വേഗതയിലെത്തിയ കാര് നിയന്ത്രണം വിട്ട് ആള്ക്കൂട്ടത്തിനിടയിലേക്ക് പാഞ്ഞ് കയറി അഞ്ച് പേര്ക്ക് ഗുരുതരമായി പരിക്കേറ്റു. വടകര തിരുവള്ളൂര് ടൗണ് ജംഗ്ഷനിലാണ് ഇന്നലെ വൈകീട്ടോടെ നാടിനെ നടുക്കിയ അപകടം നടന്നത്. അമിത വേഗതയില് എത്തിയ കാര് ഓട്ടോറിക്ഷയെ മറികടക്കാന് ശ്രമിക്കുന്നതിനിടെ നിയന്ത്രണം നഷ്ടപ്പെടുകയും റോഡരികിലേക്ക് പാഞ്ഞുകയറി അവിടെ നിന്നിരുന്നവരെ ഇടിച്ചുതെറിപ്പിക്കുകയുമായിരുന്നു. സമീപത്ത് പാര്ക്ക് ചെയ്തിരുന്ന മറ്റ് വാഹനങ്ങളിലും കാര് ഇടിച്ചു. പരിക്കേറ്റവരെ ഉടന് തന്നെ നാട്ടുകാരും പോലീസും ചേര്ന്ന് വടകര ജില്ലാ ആശുപത്രിയില് പ്രവേശിപ്പിക്കുകയായിരുന്നു. അപകടത്തില് കാറിന്റെ മുന്ഭാഗം പൂര്ണമായും തകര്ന്ന നിലയിലാണ്.
