മുല്ലപ്പെരിയാറിൽ നിലപാട് ആവർത്തിച്ച് കേരളം; പുതിയ അണക്കെട്ട് വേണമെന്ന് വി.ഡി. സതീശൻ

ദക്ഷിണ മേഖല കൗൺസിൽ യോഗത്തിൽ മുല്ലപ്പെരിയാർ വിഷയത്തിൽ കേരളം നിലപാട് ആവർത്തിച്ചു. മുല്ലപ്പെരിയാറിൽ പുതിയ അണക്കെട്ട് നിർമിക്കണമെന്ന ആവശ്യം പ്രതിപക്ഷ നേതാവ് വി.ഡി. സതീശൻ യോഗത്തിൽ ഉന്നയിച്ചു. പുതിയ അണക്കെട്ടിന്റെ നിർമാണച്ചെലവ് പൂർണമായും കേരളം വഹിക്കാമെന്നും അണക്കെട്ടിനുള്ള സ്ഥലം തമിഴ്നാടിന് തീരുമാനിക്കാമെന്നും അദ്ദേഹം വ്യക്തമാക്കി.

അതേസമയം, മുല്ലപ്പെരിയാർ വിഷയത്തിൽ നിലപാട് മയപ്പെടുത്താൻ തമിഴ്നാട് തയ്യാറായില്ല. നിലവിലെ അണക്കെട്ടിലെ ജലനിരപ്പ് 152 അടിയായി ഉയർത്തണമെന്ന ആവശ്യം തമിഴ്നാട് മുഖ്യമന്ത്രി സി. ജോസഫ് വിജയ് യോഗത്തിൽ ഉന്നയിച്ചു.

മണ്ഡല പുനർനിർണയത്തിലും വ്യത്യസ്ത നിലപാടുകൾ

ലോക്സഭാ മണ്ഡല പുനർനിർണയ വിഷയത്തിലും കേരളം ശക്തമായ നിലപാടാണ് യോഗത്തിൽ സ്വീകരിച്ചത്. ലോക്സഭയിലെ ആകെ സീറ്റുകളുടെ എണ്ണം നിലവിലെ 543 ആയി നിലനിർത്തണമെന്നും നിലവിലെ സീറ്റെണ്ണത്തിന്റെ അടിസ്ഥാനത്തിൽ വനിതാ സംവരണം നടപ്പാക്കണമെന്നും വി.ഡി. സതീശൻ ആവശ്യപ്പെട്ടു. മണ്ഡല പുനർനിർണയവുമായി ബന്ധപ്പെട്ട നടപടികൾ കോടതി വിധിയുടെ അടിസ്ഥാനത്തിലായിരിക്കണമെന്നും അദ്ദേഹം വ്യക്തമാക്കി.

അതേസമയം, സംസ്ഥാനങ്ങളുടെ ആനുപാതിക പ്രതിനിധ്യം കുറയരുതെന്ന നിലപാടാണ് തമിഴ്നാട് മുന്നോട്ടുവച്ചത്. എന്നാൽ, ലോക്സഭാ സീറ്റുകളുടെ എണ്ണം മരവിപ്പിച്ച് നിർത്തണമെന്ന ആവശ്യം തമിഴ്നാട് യോഗത്തിൽ ഉന്നയിച്ചില്ല. നിയമസഭ പാസാക്കിയ പ്രമേയത്തിലെ നിലപാടിൽനിന്ന് വ്യത്യസ്തമായി മണ്ഡല പുനർനിർണയ വിഷയത്തിൽ തമിഴ്നാട് നിലപാട് മയപ്പെടുത്തിയതായാണ് വിലയിരുത്തൽ.

കാവേരി, നീറ്റ് വിഷയങ്ങളിലും തമിഴ്നാട്

കാവേരി വിഷയത്തിൽ സുപ്രീംകോടതി വിധിയും കാവേരി ട്രൈബ്യൂണൽ തീരുമാനവും നടപ്പാക്കണമെന്ന ആവശ്യവും തമിഴ്നാട് മുന്നോട്ടുവച്ചു. നീറ്റ് പരീക്ഷയിൽനിന്ന് തമിഴ്നാടിനെ ഒഴിവാക്കണമെന്ന ആവശ്യവും യോഗത്തിൽ ഉന്നയിച്ചു.

അന്തർസംസ്ഥാന കെ.എസ്.ആർ.ടി.സി. സർവീസുകൾക്ക് ടോൾ ഒഴിവാക്കണം

അന്തർസംസ്ഥാന സർവീസുകൾ നടത്തുന്ന കെ.എസ്.ആർ.ടി.സി. ബസുകൾക്ക് ടോൾ ഒഴിവാക്കണമെന്ന ആവശ്യവും കേരളം ഉന്നയിച്ചു. സംസ്ഥാനാന്തര പൊതുഗതാഗതത്തിന് ഇത് ആശ്വാസകരമാകുമെന്നാണ് കേരളത്തിന്റെ നിലപാട്.

ബന്ദിപ്പൂർ രാത്രി യാത്രാനിരോധനം പുനഃപരിശോധിക്കണം

ബന്ദിപ്പൂർ ദേശീയപാതയിലെ രാത്രി യാത്രാനിരോധനവും കേരളം യോഗത്തിൽ ഉന്നയിച്ചു. നിലവിലെ നിരോധനത്തിന് മതിയായ ശാസ്ത്രീയ പിൻബലമില്ലെന്നാണ് കേരളത്തിന്റെ വാദം. ശാസ്ത്രീയ പഠനങ്ങളും പരിശോധനകളും നടത്തി നിയന്ത്രണങ്ങളിൽ ആവശ്യമായ പുനഃക്രമീകരണം നടത്തണമെന്നും കേരളം ആവശ്യപ്പെട്ടു.