പ്രകൃതിയിൽ വിരിഞ്ഞ മിക്കി മൗസ്! കൗതുകമായി സേനാപതിയിലെ അപൂർവ പുഷ്പക്കാഴ്ച

ഇടുക്കി: കാർട്ടൂൺ ലോകത്തെ പ്രിയതാരം മിക്കി മൗസിനെ ഓർമിപ്പിക്കുന്ന പൂക്കൾ… കറുത്ത വട്ടത്തിലുള്ള ചെവികളും ചുവന്ന മുഖവും! ഒറ്റനോട്ടത്തിൽ മിക്കി മൗസിന്റെ രൂപം തോന്നിപ്പിക്കുന്ന ഈ അപൂർവ കാഴ്ചയൊരുക്കുന്നത് പ്രകൃതിയാണ്. ഇടുക്കി സേനാപതിയിലെ മാർ ബേസിൽ ഹയർ സെക്കൻഡറി സ്കൂൾ വളപ്പിൽ വിരിഞ്ഞുനിൽക്കുന്ന മിക്കി മൗസ് ചെടികളാണ് ഇപ്പോൾ നാട്ടുകാരുടെയും സന്ദർശകരുടെയും കൗതുകമാകുന്നത്.
കറുത്ത വട്ടത്തിലുള്ള കായകളും ചുവന്ന പുഷ്പദളാവശിഷ്ടങ്ങളും ചേർന്നൊരുക്കുന്ന വിചിത്രമായ രൂപമാണ് ഈ ചെടിയുടെ പ്രത്യേകത. ‘മിക്കി മൗസ് പ്ലാന്റ്’ എന്നറിയപ്പെടുന്ന സസ്യത്തിന്റെ ശാസ്ത്രീയനാമം Ochna serrulata എന്നാണ്. പൂക്കൾ കൊഴിഞ്ഞശേഷം രൂപപ്പെടുന്ന കറുത്ത കായകളും അവയെ ചുറ്റിയുള്ള ചുവന്ന പുഷ്പദളാവശിഷ്ടങ്ങളും ചേരുമ്പോഴാണ് മിക്കി മൗസിന്റെ മുഖത്തോട് സാമ്യമുള്ള രൂപം തെളിയുന്നത്.
ഏഷ്യൻ, ആഫ്രിക്കൻ രാജ്യങ്ങളിൽ കണ്ടുവരുന്ന ഈ സസ്യം അലങ്കാരച്ചെടിയായും വ്യാപകമായി വളർത്തുന്നുണ്ട്. വരണ്ട കാലാവസ്ഥയിൽ നന്നായി വളരുന്ന ചെടിയാണിത്. അപൂർവമായ രൂപഭംഗി തന്നെയാണ് മിക്കി മൗസ് ചെടിയെ മറ്റുള്ള അലങ്കാരസസ്യങ്ങളിൽനിന്ന് വ്യത്യസ്തമാക്കുന്നത്.
2004-ലാണ് ഈ ചെടി സ്കൂൾ വളപ്പിലെത്തിയത്. തൊടുപുഴയിലെ നാഗാർജുനയിൽനിന്ന് കൊണ്ടുവന്ന തൈയാണ് ഇന്ന് കൗതുകക്കാഴ്ചയായി വളർന്നുനിൽക്കുന്നത്. ഏതാനും വർഷങ്ങൾക്ക് മുമ്പാണ് ചെടിയിൽ പൂക്കൾ വിരിയാൻ തുടങ്ങിയത്. എന്നാൽ ഇത്തവണ പതിവിലും കൂടുതൽ പൂക്കൾ വിരിഞ്ഞതോടെ കാഴ്ച കാണാനെത്തുന്നവരുടെ എണ്ണവും വർധിച്ചു.
പൂക്കളുടെ അപൂർവ സൗന്ദര്യം ആസ്വദിക്കാനും ചെടിയെക്കുറിച്ച് കൂടുതൽ അറിയാനും തൈകൾ സ്വന്തമാക്കാനുമെല്ലാം നിരവധി പേരാണ് സ്കൂളിലെത്തുന്നത്. മിക്കി മൗസിനെ അനുസ്മരിപ്പിക്കുന്ന പ്രകൃതിയുടെ ഈ വിസ്മയക്കാഴ്ച കാണാൻ ദൂരസ്ഥലങ്ങളിൽനിന്നുപോലും ആളുകളെത്തുന്നുണ്ട്.
കാർട്ടൂൺ ലോകത്തെ കഥാപാത്രത്തെ പ്രകൃതി സ്വന്തം രീതിയിൽ പുനഃസൃഷ്ടിച്ചപ്പോൾ സേനാപതിയിലെ സ്കൂൾ വളപ്പും കൗതുകസഞ്ചാരികളുടെ പ്രിയപ്പെട്ട ഇടമായി മാറുകയാണ്.






